O home acusado de matar ao seu pai na parroquia viguesa de Sárdoma a finais de 2018, M.A.Q., aceptou unha condena de cinco anos e dez meses de prisión nunha vista de conformidade celebrada este martes na sección quinta da Audiencia Provincial de Pontevedra, con sede en Vigo.
Inicialmente estaba previsto que o procesado fose xulgado por un tribunal de xurado, pero non foi necesario o desenvolvemento da vista, xa que as partes chegaron a un acordo. Así, rebaixouse a petición de pena da Fiscalía (que pedía 11 anos e medio de cárcere) polo delito de homicidio, ao considerarse moi cualificadas as atenuantes de confesión e alteración psíquica.
M.A.Q. matou a golpes ao seu proxenitor a finais de decembro de 2018 e logo depositou o seu corpo nunha leira forestal, cuberto con ramas e canas. O cadáver foi atopado a principios de xaneiro por uns veciños e, pouco despois, durante un rexistro domiciliario, o acusado recoñeceu ser autor do crime.
