O grupo municipal Marea de Vigo alertou este venres do “perigo” que pode supor adxudicar o Servizo de Axuda no Fogar do Concello olívica a unha empresa como Servisar, do grupo DomusVi.
Segundo trasladou este grupo, DomusVi é unha empresa “tristemente destacada por precarizar os coidados para optimizar o seu negocio”, e advertiu dos problemas que podería haber se se fai con ese servizo (no proceso de licitación é a que ten máis puntos, por enriba da actual concesionaria, Clece).
A concelleira de Marea, Oriana Méndez, insistiu e que “se hai negocio, non hai coidados”, e reiterou a necesidade de avanzar na municipalización dese servizo, e de garantir “unhas condicións dignas no traballo esencial dos coidados”.
Segundo lembrou, a xestión de Clece xa “presentaba moitas dúbidas”, pero unha concesión ao grupo DomusVi “cando aínda estamos en plena pandemia” resulta “verdadeiramente preocupante”. “DomusVi representa un claro exemplo de mercantilización do dereito aos coidados”, sinalou Méndez.
Finalmente, Marea de Vigo denunciou a “chantaxe” que as empresas de servizos exercen nos concellos, condicionando prezos e “inflándoos” coa “escusa da aplicación dos protocolos da COVID”, polo que repetiu que o Concello debe asumir a xestión pública dos servizos sociais.
