O ministro do Interior, Fernando Grande Marlaska, pediu desde a praia de Samil, en Vigo, o voto para o candidato socialista á presidencia da Xunta, Gonzalo Caballero, para lograr un “verdadeiro goberno progresista” na Xunta.
“O Goberno central necesita gobernos autonómicos importantes, como o de Galicia, que sexan verdadeiros gobernos progresistas”, manifestou Marlaska, convencido de que “iso” só o garante en Galicia Gonzalo Caballero e o PsdeG-PSOE.
Así, en referencia ao aspirante socialista, asegurou que ten “forza, ideais e equipo”. “Pero sobre todo ten un partido importante detrás, un partido serio, que estivo sempre coa sensibilidade do Estado e do autogoberno“, indicou.
Acompañado polo candidato socialista á Xunta, Grande Marlaska percorreu o paseo desta praia xunto ao alcalde de Vigo, Abel Caballero, e a presidenta da Deputación de Pontevedra, Carmela Silva.
A comitiva socialista, entre a que se atopaban candidatos, militantes da cidade e os zancudos que acompañan a campaña do PSdeG, espertou gran expectación entre a veciñanza que neste domingo se atopaba gozando do sol no areal.
No percorrido, durante o que varias persoas se achegaron ao ministro para sacar unha foto, Gonzalo Caballero describiulle a Marlaska a cidade de Vigo. “Pero as marabillas son as de en fronte”, sinaloulle en referencia ás Illas Cíes.
“A próxima vez traio o bañador”, comentou o ministro antes de que o alcalde retase á prensa a bañarse. “Se vos atrevedes vós, nós imos”, exclamou o rexedor.
