A Xunta e responsables do Programa Integrado de Emprego (PIE) da Asociación de Comerciantes e Profesionais Zona Príncipe de Vigo avogaron por potenciar a formación para mellorar a empregabilidade e fortalecer o tecido empresarial.

Nun encontro mantido este luns de modo telemático, o director xeral de Orientación e Promoción Laboral, Pablo Casal, asegurou que a formación permitirá axustarse aos perfís e competencias demandados polas empresas.

Ademais, lembrou que as clases do programa de emprego foron suspendidas debido á pandemia da COVID-19 e substituídas por unha modalidade virtual, pero sinalou a aposta do Goberno galego por que se finalicen de modo presencial. De feito, explicou que se traballa para permitir recuperar as sesións que foron suspendidas de acordo coas garantías sanitarias esixibles.

En concreto, este programa conta con 100 participantes e está destinado a mellorar a empregabilidade de persoas novas sen emprego de Vigo e área, Cangas e Moaña.

Estes alumnos reciben formación en idiomas e ofimática e preparación relativa a ámbitos como a atención sociosanitaria a dependentes en institucións sociais. Ademais, poden participar en talleres de ‘coaching’ e intelixencia emocional.