A agrupación socialista de Vigo esixiu este mércores “explicacións” á Xunta de Galicia e ao presidente Feijóo pola “praga de pulgas” detectada no Hospital Álvaro Cunqueiro, algo “especialmente grave”, ao seu xuízo, na actual situación de emerxencia sanitaria pola pandemia de coronavirus.

Así o manifestou, nunhas declaracións remitidas aos medios, o secretario xeral da agrupación socialista viguesa, Abel Losada, quen tachou de “inaudita en calquera momento, en calquera país europeo” a aparición deses insectos nun centro hospitalario.

Ademais, Losada sinalou que, hai uns días, o presidente da Xunta pediu empregar os fondos que o Goberno liberará para Educación e Sanidade “noutras políticas” e, tras o coñecido no hospital vigués, “dá a sensación de que a sanidade pública galega necesita imperiosamente os fondos”.

“Feijóo non pode trasladar a idea de que as necesidades de Sanidade e Educación están cubertas, e que no mesmo momento estea a desaloxarse un hospital por unha praga de pulgas”, incidiu o secretario xeral dos socialistas de Vigo, quen subliñou que o sucedido no Álvaro Cunqueiro “é algo que non ocorre, fóra de zonas do terceiro mundo”.

O Sergas confirmou que, o pasado fin de semana, foi necesario trasladar a unha trintena de pacientes que se atopaban na zona de Traumatoloxía e Cirurxía Plástica da ‘vela’ 2B do hospital, debido a que se detectaron pulgas.

Os pacientes foron cambiados á ‘vela’ 2A, que xa estaba liberada en previsión de que fose necesaria para pacientes con COVID, e a zona afectada xa se atopa libre de pulgas tras unha desinsectación.

Fontes sanitarias confirmaron que os pacientes que foron trasladados xa non regresaron á ‘vela’ 2B para aforrarlles as molestias dun novo cambio, e precisaron que a aparición de pulgas é unha situación allea ao funcionamento interno do hospital.