Delegados da CIG realizaron protestas este martes en Vigo e nas outras seis cidades galegas para esixir unha saída “xusta” da crise na que se protexa á clase traballadora fronte ao capital. Así, celebrou marchas que confluíron en prazas das cidades formadas por columnas de 30 persoas coa correspondente distancia de separación.

O secretario xeral da CIG, Paulo Carril, sinalou a importancia de retomar a mobilización para forzar os gobernos a que lexislen en favor das maiorías sociais fronte ás políticas “inxustas e erráticas” do Goberno e a Xunta, pois avisa de que esta situación non se pode afrontar coas “mesmas receitas neoliberais”.

A CIG lamenta que se aposte pola precariedade laboral “froito da aplicación das reformas laborais, das pensións e da negociación colectiva”, con “profundos recortes” en servizos públicos. A este respecto, o secretario xeral do sindicato censura o novo acordo social entre o Goberno central e sindicatos, que tacha de “nova reforma laboral”.

Así mesmo, carga contra o presidente da Xunta, Alberto Núñez Feijóo, “máis preocupado por facer electoralismo sen escrúpulos e fomentar unha fraudulenta imaxe reivindicativa ante Madrid” que por exercer as súas competencias.