A asociación española de Almacenistas, Importadores, Transformadores e Exportadores de Produtos da Pesca e Acuicultura, Conxemar, denunciou este venres que, “dunha forma incrible”, a Comisión Europea deixa fóra das axudas destinadas á pesca a este sector.
Conxemar lembrou que o informe da Comisión sobre as axudas para apoiar a pesca e a acuicultura, pola suspensión de actividade derivada da crise do coronavirus, establece fondos para o sector extractivo baseándose “na necesidade de liquidez”, e para o sector acuícola para “garantir compensación financeira” pola suspensión ou redución da produción.
Tamén se anunciaron axudas aos produtores para o almacenamento temporal dos produtos da pesca e a acuicultura.
“Dunha forma incrible, déixase fóra das axudas ao sector das industrias de transformación e á comercialización, xa sexa de peixe fresco ou conxelado, e a todo o sector comercial, que distribúe estes produtos”, criticou Conxemar, que lembrou que eses distribuidores levan a mercadoría especialmente a pemes que venden á canle horeca (hoteis, restaurantes e cafetarías).
Segundo incidiu a asociación, estes establecementos están obrigados a pechar pola crise sanitaria, coa consecuente perda de todos os ingresos para estas empresas, “incluso o risco de non cobrar os pedidos entregados antes da declaración do estado de alarma”.
Finalmente, Conxemar fixo un chamamento á atención de “autoridades europeas, estatais e autonómicas”, ante “tal manifesta inxustiza cos máis débiles”, para que as axudas cheguen tamén a estas empresas.
