O presidente da Xunta, Alberto Núñez Feijóo, que evitou pronunciarse sobre o seu futuro político e o de Mariano Rajoy, celebrou este luns os datos de descenso do paro, e recalcou que “Galicia volve estar entre as Comunidades Autónomas con maior descenso” no número de desempregados, o que é “unha gran noticia”.

O titular do Executivo galego fixo esta reflexión durante a súa intervención ante os medios con motivo dunha visita ás obras da nova Cidade da Xustiza en Vigo.

Así, lembrou que, con respecto a maio de 2017, hai unhas 22.900 persoas menos “apuntadas ás listas do paro” e, “o que é máis importante”, hai máis de 26.700 novos afiliados á Seguridade Social no último ano. “Iso acredita que en Galicia baixa o paro de forma máis intensa que na media de España”, sinalou, e expresou o seu desexo de que “siga a recuperación económica”.

A ese respecto, apuntou que a comunidade galega leva “dez trimestres crecendo por enriba do 3 por cento” e que se está ante “unha recuperación económica importante”.