O Exército de Terra iniciou nas últimas horas o seu despregamento nas cidades españolas, entre elas en Vigo, onde efectivos da Brilat xa realizaron recoñecementos por diversos puntos estratéxicos para “futuros patrullaxes”, segundo confirmou o Ministerio de Defensa, no marco das medidas extraordinarias postas en marcha para tratar de conter o avance da epidemia de coronavirus.

Así, a Compañía de Mando e Apoio do Batallón Zamora I/29 da Brilat realizou recoñecementos con unidades despregadas polas zonas máis transitadas de Vigo, e por porto, aeroporto, as dúas estacións de tren (Urzáiz e Guixar) e as prazas máis concorridas.

O alcalde, Abel Caballero, xa avanzara nas últimas horas que o Exército de Terra chegaría á cidade olívica para reforzar a vixilancia e o cumprimento das restricións do estado de alarma.

As Forzas Armadas despregáronse tamén noutras cidades, con presenza da Unidade Militar de Emerxencias en moitas delas, para labores de desinfección, ou para atención a persoas sen fogar.