Un estudo elaborado ao amparo da Cátedra Feminismos 4.0 da UVigo, constatou que a inmensa maioría das mulleres tituladas no ámbito das enxeñarías perciben discriminación por razón de xénero ao chegar ao mercado laboral.

Así se reflicte neste informe, presentado este mércores polos seus autores (investigadores da institución académica viguesa), e realizado a partir de máis de medio milleiro de enquisas a graduados en diferentes titulacións do ámbito das enxeñarías que se imparten na Universidade de Vigo (Enxeñaría de Minas e Enerxía, Telecomunicacións, Industriais e Forestais), que se incorporaron ao mercado laboral e das que un 33% eran mulleres.

Das mulleres que responderon o cuestionario, só un 2% afirmou non percibir discriminación de xénero no seu posto de traballo, mentres que o resto referiu situacións de ‘ninguneo profesional’ (un 54,1 %), brecha salarial (47,5 %), dificultades para promocionar (45,9 %) e acoso sexual por razón de xénero (14,8 %). Da enquisa tamén se extrae que, pola súa banda, é moito maior a porcentaxe de homes que afirma non detectar esa discriminación por razón de xénero (un 68 %).

Por outra banda, o estudo pon de manifesto que son as mulleres as que apuntan a necesidade de medidas de conciliación para conseguir maiores cotas de igualdade. A investigación forma parte dun proxecto sobre rendemento académico e gradación de mulleres nas titulacións de enxeñaría da UVigo, e que tamén analizou aspectos relacionados co ingreso nas carreiras, ou o desenvolvemento dos estudos.

Así, os investigadores comprobaron que hai un estancamento na proporción de mulleres matriculadas neses estudos (un 22% en titulacións adaptadas ao Espazo Europeo de Educación Superior e un 25% nas antigas LRU). Aínda así, hai titulacións nas que o número de mulleres é maior, como Enxeñaría Química.

No entanto, e a pesar de estudar nun ambiente masculinizado, as mozas que cursan graos de enxeñaría mostran, segundo o estudo, un rendemento académicos máis satisfactorio que os homes.