O alcalde de Vigo, Abel Caballero, anunciou este martes a convocatoria dun concurso de ideas, no que aspira a que participen “arquitectos notables” para renovar os espazos e inmobles situados fronte á concatedral, no Casco Vello da cidade.

O rexedor confirmou a declaración, como “área prioritaria”, dos números 7, 8 e 9 da Praza da Igrexa, e anunciou que se iniciou o expediente expropiatorio (no caso de que non haxa acordo cos propietarios) para actuar, de modo conxunto, neses catro inmobles.

Caballero explicou que se convocará un concurso de ideas para facer esa reforma, que terá que executarse de acordo coas disposicións do Plan Especial do barrio histórico. Así, o máximo de edificabilidade permitida é de 580 metros cadrados, e prevese retranquear o conxunto, o que permitirá ampliar a praza.

Por outra banda, o rexedor tamén confirmou que se abriu o prazo de consulta pública para a nova ordenanza do taxi. A nova norma regulará, entre outras cuestións, o uso do taxi compartido (pensando especialmente nos veciños de zonas máis rurais), e reducirase o máximo de antiguedad dos vehículos a 10 anos.