O grupo municipal Marea de Vigo instou o alcalde, Abel Caballero, a deixar de “sacar convenios da chisteira” para solucionar a cuestión do transporte dos viaxeiros non empadroados na cidade, e avogou por renegociar ou aclarar o convenio que no seu día o goberno local asinou coa Xunta, e que contemplaba o cofinanciamento das bonificacións.

A través dun comunicado, este grupo político criticou que o rexedor aluda agora á firma de convenios para facilitar aos usuarios non censados o acceso ao cartón que bonifica as viaxes en bus urbano (de maneira que non teña que pagar Vigo esas subvencións).

Segundo o seu portavoz, Rubén Pérez, habería que recuperar o acordo (asinado en xullo de 2016 e anulado polo Concello menos dun ano despois, sen que chegase a entrar en vigor), pero aclarando a “dobre interpretación” que fixeron ambas as administracións sobre a achega de cada unha e sobre os traxectos subvencionados.

Tras lembrar que o convenio contemplaba que unha parte da subvención era abonada pola Xunta e outra polo Concello, o concelleiro de Marea sinalou que, retomando ese acordo, “evitaríase un novo esperpento e un aproveitamento oportunista de partidos políticos e alcaldes, nunha situación que só beneficia a unha concesionaria (Vitrasa)”.

Rubén Pérez pediu “empatía” ao goberno vigués, ao que lembrou que os veciños da cidade poden beneficiarse de bonificacións en transportes interurbanos ou no de ría, grazas á achega doutros concellos, e sen que o de Vigo “poña un duro”.

Finalmente, Marea lembrou que, cando en 2018 levou a pleno unha moción para esixirlle á Xunta un novo borrador do convenio de transporte metropolitano, o grupo do goberno (PSOE) “votou en contra”.