A conselleira de Medio Ambiente, Territorio e Vivenda, Ángeles Vázquez, instou ao alcalde da cidade olívica, Abel Caballero, a demandar ao Goberno central o “desbloqueo” da ampliación do Instituto Feiral de Vigo (Ifevi) e a área de Recaré.

Nunha entrevista concedida a Onda Cero Vigo e recollida pola Consellería de Medio Ambiente, Territorio e Vivenda, a conselleira afirmou que o rexedor debería “aplicar” a “esixencia e rotundidade” coa que se dirixe ao Executivo galego para reclamar proxectos importantes para a cidade que dependen do Goberno central.

Nese sentido, a titular autonómica de Territorio reivindicou que o Executivo galego “non para de traballar e buscar solucións aos problemas dos veciños e o tecido empresarial” da urbe olívica. “Quen paraliza os grandes proxectos de Vigo non é a Xunta, senón o ministro Ábalos”, afirmou en alusión ao titular da carteira de Transportes, Mobilidade e Axenda Urbana.

En concreto, a Dirección Xeral de Estradas rexeitou recentemente o proxecto da área comercial prevista en Recaré. Xa recibiu a negativa do Ministerio de Transportes en dúas ocasións anteriores. Ademais, a Dirección Xeral de Aviación Civil dependente do mesmo departamento debe emitir un informe favorable para permitir que se acometa a ampliación do recinto feiral de Vigo.