A Xunta de Goberno local do Concello de Vigo deu luz verde este xoves ao proxecto básico para a reforma do paseo de Bouzas, que contará cun investimento de case 1,3 millóns de euros, e que agora remitirá á Direción Xeral da Costa e o Mar para que este organismo estatal ceda o chan á administración municipal.

Así o trasladou en rolda de prensa o alcalde, Abel Caballero. Explicou que a actuación afectará a máis de 500 metros de paseo, que van desde a zona da praia fronte á igrexa, ata o final dese tramo, á altura da ponte da VG-20.

Este mesmo xoves o proxecto será remitido a Costas para que ceda o espazo e o Concello poida facer a obra, que ten un prazo de execución de 11 meses. Mentres se resolve a cesión, a administración local elaborará o proxecto construtivo, e prevé poder licitar os traballos “no último trimestre de 2020”.

O alcalde subliñou que se trata dun proxecto “enormemente ambicioso“, que contempla nova pavimentación, renovación do paseo de madeira, elementos ornamentais, varandas, ramplas de baixada á praia, e zonas verdes. Así mesmo, precisou que esta actuación é unha “primeira fase” da rexeneración do litoral, xa que se fará unha segunda actuación para estender o paseo ata Samil.

Abel Caballero lembrou que o Concello tivo que pechar parte do paseo polo seu mal estado, e denunciou que foi a administración central dirixida polo PP a “causante dese desaguisado” porque, en sete anos, “non fixo nada” para manter ese espazo en boas condicións.

A PROTESTA VECIÑAL FIXO EFECTO

Os veciños do barrio de Bouzas, levan protestando polo arranxo do paseo desde fai case un ano. Aínda así, nun comunicado, a veciñanza pediu que non se fixese “ningún tipo de obra colosal por parte do Concello“, senón que pedían “o mantemento da zona, en equilibrio co medioambiente”.