Axentes da Policía Local de Vigo detiveron un veciño da cidade, C.O.O., de 18 anos de idade, como presunto autor dun delito de roubo con violencia en grao de tentativa, tras perseguir e ameazar a un menor para que lle entregase todo o que levaba.

Segundo informaron fontes policiais, os feitos ocorreron á primeira hora da tarde do xoves, cando un home chamou á Policía para informar de que se atopaba na zona do Berbés, xunto a un menor, que se refuxiou nunha obra porque un individuo o perseguía para roubarlle.

Cando chegaron os axentes, o menor (un neno de 14 anos de idade natural de Colombia) explicou que ía camiñando pola rúa e que se decatou de que un individuo o perseguía. Ao apurar o paso, ese individuo abordouno e esixiulle, ameazándoo gravemente, que lle entregase todo o que tiña.

Dado que o menor non levaba nada de valor encima, o asaltante cominoulle a que lle entregase a cazadora e, cando o neno se estaba desposuíndo da peza, aproveitando un descoido do ladrón (que se distraeu vixiando a contorna), fuxiu á carreira e refuxiouse nunha obra.

Os axentes acompañaron ao neno ao seu domicilio, onde quedou a cargo da súa nai, e iniciaron a procura do sospeitoso, grazas á descrición que fixeron a vítima e o home que lle axudou.

Finalmente, o sospeitoso foi localizado nesa mesma zona algo máis dunha hora despois. O home que acompañara ao menor, e que se atopaba na zona, recoñeceuno, polo que foi detido por un delito de roubo con violencia en grao de tentativa.