Responsables sindicais de Unión Xeral de Traballadores (UGT) e Comisións Obreiras (CC.OO.) trasladaron á delegada territorial da Xunta en Vigo, Corina Porro, a falta de prazas en residencias públicas de persoas maiores na zona.

Os sindicatos detallaron en senllos comunicados que o encontro tivo lugar este xoves en Vigo, onde a delegada asegurou descoñecer o documento de necesidades da dependencia presentado no rexistro do edificio do Goberno galego na cidade.

Nese contexto, Porro recoñeceu a importancia de impulsar actuacións no ámbito da dependencia e comprometeuse a manter unha nova reunión en xaneiro cos sindicalistas tras o estudo das súas demandas.

En concreto, UGT e CC.OO. avogaron pola construción dunha residencia de persoas maiores que poida acoller a persoas con distintos graos de dependencia nunha parcela de titularidade autonómica situada en Vigo. Ademais, instaron ao Executivo autonómico a elaborar un plan para construír as 400 prazas que calculan que se precisan na área.

Así mesmo, esixiron a redacción dunha normativa que regule os tempos de espera para acceder a estes espazos residenciais e o cumprimento da lei de dependencia, así como situar ás persoas maiores no Sistema Nacional de Saúde (SNS).

Os sindicatos tamén avogaron por unha mellora dos sistemas de inspección dos centros de persoas maiores e propuxeron que o consello consultivo do colectivo analice as súas necesidades.