As obras da terminal de autobuses que se integrará na estación intermodal de Vigo-Urzáiz iniciáronse este luns na cidade olívica. Así, tras a preparación da explanación, unha pilotera procederá a executar distintos traballos enfocados a constituír as paredes dos túneles de acceso.
Precisamente, o presidente da Xunta, Alberto Núñez Feijóo, e o alcalde da cidade olívica, Abel Caballero, asistiron ao comezo destas obras, cuxos traballos previos se realizan desde finais de setembro.
En concreto, o orzamento da obra da estación de autobuses ascende a 15,18 millóns de euros e comprende un ámbito de actuación de máis de 11.000 metros cadrados. Así, a estación de autobuses ocupará 676.000 metros cadrados e, os seus accesos á A9-9, máis de 4.300.
En total, a nova estación, á que se espera que accedan uns 500 autobuses diarios, contará con 30 dársenas, das que 22 serán de plataforma e outros oito de regulación. Mentres, o edificio de servizos para os viaxeiros, cuxo número se estima en dous millóns anuais, ocupará case 1.100 metros cadrados.
“COOPERACIÓN INSTITUCIONAL”
Neste contexto, o rexedor, que en múltiples ocasións reclamou un maior investimento do Goberno galego na cidade, puxo de manifesto a “cooperación total e aberta” co Executivo autonómico que permitiu levar a cabo esta obra. Pola súa banda, Feijóo presentouna como o “produto dunha colaboración institucional complexa” entre os tres niveis da administración pública e insistiu na necesidade de “coordinar ao máximo” a execución das instalacións e os seus accesos.
Así mesmo, o titular do Executivo galego lembrou como a tramitación por parte da Xunta da lei 3/2016, coñecida como Lei Vigo, permitiu que levase a cabo esta obra e valorou que “as dificultades” desen paso a “execucións materiais”. “Esta estación de autobuses xa non ten volta atrás”, remachou.
Nesa liña, Feijóo asegurou que a nova estación intermodal forma parte da clase de infraestruturas que “cambian a competitividade da cidade” e avanzou que tamén modificará o seu “futuro”, ademais de resaltar o investimento da Xunta en distintas actuacións na urbe galega.
Mentres, o alcalde de Vigo agradeceu o “traballo” e a “dedicación” do Executivo galego que, segundo apuntou, permitiron que a estación de autobuses converteuse nunha “realidade irreversible”. Tamén apostou por manter a “coordinación” entre o Concello e o Goberno autonómico nun “camiño” no que lembrou que tamén se deberá decidir o futuro da estación de tren de Guixar.
Na súa intervención, Caballero recoñeceu adicionalmente o papel do Goberno central, que permitiu que se decidise que os trens de alta velocidade entrasen na urbe mediante un túnel e, deste xeito, se evitase “cortala” en dous. Así, puxo en valor o deseño da estación intermodal por parte do arquitecto Thom Mayne, cuxa posta en funcionamento está prevista para abril de 2021, e asegurou que se trata dunha “gran construción”.
CONEXIÓN DE ALTA VELOCIDADE CON MADRID
Por outra banda, o presidente da Xunta remarcou a necesidade de “traballar” para conseguir a conexión de Vigo con Madrid mediante a alta velocidade “no menor tempo posible”, cuxa importancia tamén sinalou o rexedor olívico.
Noutra orde de cousas, Feijóo recalcou a relevancia de que o Corredor Atlántico de mercadorías sexa “un corredor real conseguido nos Orzamentos Xerais do Estado (PGE)” e nas partidas orzamentarias da Unión Europea (UE). Deste xeito, afirmou que “posibilitará a saída sur de Vigo” e que o Porto de Vigo “poida falar de ti a ti” co Porto de Leixoes, o Norte de Portugal e o resto das plataformas loxísticas do Atlántico.
Tamén insistiu na necesidade de que se elimine a peaxe da AP-9 entre esta cidade e Redondela e de que se achegue unha solución para a A-55, que conecta a maior urbe galega co Porriño e que supón “unha das autovías máis perigosas” de España.
