A Policía Local de Vigo detivo na mañá deste domingo a dous homes que previamente roubaran o bolso a unha anciá de 80 anos polo método do tirón na zona da rúa Pi y Margall.

Eran sobre as 11,30 horas cando unha unidade da Policía Local observou a V.D.C.F., de Vigo e 80 anos de idade, gritando e pedindo auxilio, así como a dous individuos á carreira cun bolso. Por iso, os axentes iniciaron a persecución.

Tal como informou a Policía nun comunicado, tras darlles alcance, un dos ladróns encarouse cos actuantes, tratando de evitar que interceptasen ao seu cómplice lanzándolles patadas e puñadas. Con todo, o outro implicado foi interceptado na confluencia con Paseo de Alfonso XII.

Por estes feitos, E.D.V. de 19 anos e G.F.P. de 38, foron detidos pola comisión dun delito de roubo con forza.

ATRACO A UNHA PASTELARÍA

Pola súa banda, a Policía Nacional detivo na tarde deste domingo a un home de 46 anos de idade, de nacionalidade española e con domicilio en Vigo, despois de roubar armado cun coitelo “de grandes dimensións” e coa cara oculta nunha pastelaría da rúa Enrique Lorenzo.

Segundo o relato da vítima (a dependenta do establecemento), que recolle a Policía Nacional nun comunicado, tras achegarse a ela cando se atopaba soa no local, o agora detido púxolle o coitelo no costado e empuxouna cara á caixa rexistradora esixíndolle que a abrise, para seguidamente coller o diñeiro e fuxir en dirección á avenida de Buenos Aires.

Tras a súa procura, o home, que conta con oito antecedentes policiais, varios deles por feitos similares, foi localizado cando tentaba ocultarse no interior dunha vivenda dun inmoble da rúa Sanjurjo Badía.