O alcalde de Vigo, Abel Caballero, asegurou este xoves que sería “unha catástrofe” para a cidade olívica que a exministra de Sanidade no goberno de José María Aznar e de Fomento con Mariano Rajoy e número dous por Madrid para as eleccións xerais do próximo domingo, Ana Pastor, fose outra vez ministra, xa que, segundo el, “tivo o AVE a Vigo conxelado e metido nun caixón durante cinco anos”.

Todo isto despois de que este mércores Pablo Casado dixese que se chega ao Goberno Ana Pastor volvería ser ministra. Neste sentido, Caballero indicou en que esa circunstancia “non vai pasar” porque non hai “ningunha” posibilidade de que Casado gañe as eleccións.

Caballero insistiu no “avance” que supuxo, ao seu xuízo, a chegada de Pedro Sánchez á Moncloa, polo que pediu o voto para o PSOE, e así conseguir os socialistas ata catro deputados por Pontevedra o cal “daría forza para seguir reclamando cousas para Vigo”.