O tráfico total de mercadorías incrementouse un 5,25% no Porto de Vigo durante o mes de setembro, en comparación co mesmo período do ano anterior, polo que sumou un volume de 361.823 toneladas.
Segundo recolleu a Autoridade Portuaria nun comunicado, este incremento é debido, en parte, ao aumento do tráfico de mercadorías dun 5,54% e da pesca fresca, nun 5,10%. Con todo, os avituallamentos descenderon un 2,88%.
Así, a Autoridade Portuaria subliñou o “moi bo dato” dos automóbiles neste setembro, cun aumento do 44,60% e “xeneralizado” con todos os países con tráfico significativo, polo que destacou o caso de Francia (+73,69%), Reino Unido (+69,86%) e Bélxica (+21,40%), así como Turquía, que aumenta un 135,81%.
A pesca conxelada incrementouse nun 20,97%, ata situarse no “mellor dato dos últimos 10 anos”. En canto ás importacións (80% do tráfico), aumentaron de maneira “considerable” as procedentes de Malvinas (+230,87%), Arxentina (+88,06%) e Perú (+79,84%). As exportacións, que se mantén en cifras similares ás do mesmo mes do ano anterior, teñen como principais mercados China e Exipto.
PEZAS DE VEHÍCULOS
Pola súa banda, o tráfico de pezas de vehículos incrementouse un 16,09%, manténdose Francia como principal país de intercambio desta mercadoría, pero rexistrando Canadá un crecemento do 52,99%, situándose como segundo país en intercambio comercial destes produtos.
Outras mercadorías que tiveron un comportamento positivo foron as conservas (+14,22%), o cemento (+5,03%), as madeiras (+8,97%) e os alimentos en xeral (+13,24%). En canto ás mercadorías que neste mes pecharon en negativo son os metais (-12,05%) e o granito en bruto (-22,20%).
En cando ao tráfico de pasaxe, tanto o do interior ou de ría como o de cruceiro turístico tiveron un comportamento “moi positivo”, polo que o Porto destacou o crecemento do 43,64% dos cruceristas.
En canto á pesca fresca, a súa evolución este mes de setembro foi tamén á alza, tanto en volume de movemento como en valor de venda, “en especial os peixes, que son os que achegan maior volume de transaccións e actividade pesqueira”.
ACUMULADO ATA SETEMBRO
No acumulado do ano, o tráfico de mercadorías (graneis sólidos, graneis líquidos e mercadoría xeral) alcanza a cifra de 3,07 millóns de toneladas, o que supón un 1,03% menos en comparación co primeiros nove meses de 2018. “Na evolución dos tráficos totais do porto acumulados a setembro, nos últimos cinco anos, vemos como o presente exercicio cae o tráfico con respecto a 2018, aínda que sobre exercicios anteriores segue mantendo unha tendencia positiva”, indicou.
DATOS ECONÓMICOS
Tal como indicou a Autoridade Portuaria, a súa conta de resultados do mes de setembro presenta uns datos “bastante inferiores” ao de hai un ano. En concreto, o resultado de explotación é inferior en 783.000 euros, pasando de 1,05 millóns en 2018 a 275.000 euros este ano. O resultado despois de impostos queda en 283.000 euros.
“Isto débese a varios factores entre os que destaca claramente o resultado das taxas da pesca fresca e, en especial, a taxa da mercadoría, que experimentou unha diminución de 416.000 euros neste primeiros nove meses do ano, debido á redución dun 10% que a Lei Xeral de Orzamentos aprobada en xullo de 2018 estableceu para esta taxa”, explicou a Autoridade Portuaria.
Doutra banda, produciuse un incremento dos gastos de explotación como, por exemplo, o relativo aos gastos de conservación, que aumentaron case un 20% tras realizarse varias reparacións na lonxa e no mercado do porto pesqueiro e no peirao de Transatlánticos. Así mesmo, incrementáronse as achegas a Portos do Estado.
