O comité de empresa de Vitrasa, concesionaria do transporte urbano do Concello de Vigo, presentou unha denuncia ante a Inspección de Traballo polo “incumprimento” por parte da compañía dos tempos de descanso durante a xornada laboral dos condutores.

Así o sinalou nun comunicado a Confederación Intersindical Galega (CIG), quen lamentou que Vitrasa “siga sen respectar as medidas preventivas que figuran na súa propia avaliación de riscos”.

Na denuncia, a representación do persoal de Vitrasa fai mención a que na avaliación de riscos da empresa se establecen como medidas preventivas que “ningún traballador poderá conducir de maneira ininterrompida máis de catro horas e media sen facer unha pausa” e que a duración mínima desa pausa será de 45 minutos, “podendo fraccionarse en interrupcións de polo menos 15 minutos cada unha ao longo do período de condución”. Segundo a CIG, a pesar dos “incumprimentos reiterados” destas medidas de seguridade, a resposta da empresa “foi que hai que revisar a avaliación”. 

Así mesmo, o comité tamén puxo en coñecemento de Inspección de Traballo que a compañía “non atendeu o requirimento da autoridade laboral a respecto dos aseos para condutores“. “Unicamente se instalou un aseo público, e non nos constan negociacións da empresa co Concello ou cafetarías, e moito menos un mínimo de vontade de solucionar este problema”, sentenciou a asociación sindical.