Axentes da Policía Local de Vigo detiveron a un veciño da cidade de 48 anos de idade, M.C.M., como presunto autor dun delito de violencia de xénero, tras zarandear e tirar ao chan á súa parella no transcurso dunha discusión.
Segundo informaron fontes policiais, o 092 recibiu o aviso na mañá do luns, por parte dunha muller que vive na zona de Ramón Neto. Cando chegaron os axentes, ela relatou que o día anterior tivera unha discusión coa súa parella, e que el a había zarandeado e tirado ao chan varias veces.
Tras este episodio violento, o presunto agresor abandonou o lugar nun coche da súa propiedade e en cuxo interior, segundo a versión da muller, ela deixara uns 3.000 euros.
A vítima presentaba negróns en ambos os brazos, e tamén refería unha forte dor de cabeza e de pescozo, polo que os axentes solicitaron unha ambulancia medicalizada. A muller foi evacuada ao hospital Povisa para unha valoración facultativa máis exhaustiva.
A policía puido localizar ao sospeitoso pouco despois do mediodía do luns. Este atopábase a uns 300 metros do domicilio e foi inmediatamente detido.
Así mesmo, os axentes localizaron o vehículo, que estaba mal estacionado, e o guindastre retirouno, á espera de que o xulgado autorice abrilo para comprobar se no seu interior está o diñeiro referido pola denunciante.
