Axentes da Policía Local de Vigo detiveron a un veciño da cidade, de 42 anos de idade, J.J.F.G., como presunto autor dun delito de furto, tras subtraer a mochila dunha bañista na praia de Samil.

Segundo informaron fontes policiais, os feitos ocorreron o pasado venres pola tarde, cando unha dotación da Patrulla de Costa e Praias do 092 foi requirida por varios cidadáns, quen alertaron de que se cometeu un furto no areal.

Cando chegaron os axentes observaron que un home estaba a reter a outro, e que había unha muller nerviosa con eles. Esta señora explicoulles que se estaba refrescando na beira da praia, cando se decatou de que un individuo levaba a súa mochila.

Ante esa situación, a muller comezou a gritar e alertar ao resto de bañistas, entre os que estaba un axente de Policía Nacional fóra de servizo, que se botou a correr detrás do presunto ladrón e logrou interceptalo.