A Asociación Veciñal de Teis reclamou ao Concello de Vigo a reparación da pista de patinaxe situada no parque público da ETEA dado que carece de valado nunha parte e, noutra, atópase deteriorado.

Mediante un comunicado, a asociación veciñal esixiu esta actuación tras a finalización dos traballos de limpeza da vexetación e curta de árbores. Deste xeito, advertiu de que os danos presentes no valado e en tramos do peche do parque poden supor un “perigo” para os seus usuarios, en especial para os nenos.

Neste sentido, asegurou que esta entidade se dirixiu ao Consistorio con este fin a través de senllas cartas remitidas en maio e xuño deste ano. Ademais, apuntou que, tras iso, só se acometeron uns traballos “mínimos” de reposición do cercado, pero que este non se reparou ata o nivel no que se atopaba inicialmente, polo que os danos seguen vixentes.

Nesta liña, a asociación de veciños preguntouse por que o Concello non inspeccionou a zona tras a finalización dos traballos de limpeza de vexetación para comprobar se existían danos na zona co obxectivo de obrigar á empresa que levou a cabo a actuación a reparalos.