A corporación municipal de Vigo aprobou no pleno extraordinario que tivo lugar este mércores o Instrumento de Medidas Provisionais de Ordenación.

Nunha sesión á que non asistiu o alcalde, Abel Caballero; o Grupo Municipal Socialista e o Grupo Municipal Popular votaron a favor da aprobación do instrumento urbanístico. Mentres, o Grupo Mixto, integrado polos dous edís de Marea de Vigo-Son En Común, e o concelleiro nacionalista que figura como non adscrito, Xabier P. Igrexas, situáronse en contra.

Durante a súa intervención, a concelleira de Urbanismo, María José Caride, subliñou a importancia da aprobación deste instrumento provisional, xa que permitirá a aquelas persoas ou empresas recuperar os seus proxectos, que foran “truncados” coa anulación do Plan Xeral de Ordenación Municipal (PXOM) de 2008.

Neste sentido, sinalou que a ordenación provisional permitirá recuperar parte do plan anulado para chan urbano consolidado, chan urbano non consolidado “moi desenvolvido”, chan terciario e de interese xeral. Para estes últimos, indicou que o Concello de Vigo iniciou a tramitación de dous proxectos co sistema de ordenación provisional.

Ademais, puxo en valor que a aprobación deste instrumento permite actuar sobre o 38 por cento do termo municipal e lembrou o “apoio social” que solicitou debido a que só se recibiron 428 alegacións, das que parte foron formuladas por persoas cuxas parcelas non estaban incluídas e buscaban modificar esta situación.

CRÍTICAS DA OPOSICIÓN

O portavoz do Grupo Municipal Popular, Alfonso Marnotes, afirmou que a súa formación decidiu apoiar este instrumento urbanístico porque recupera o aprobado en pleno en 2006, durante a etapa na que o PP ostentaba a Alcaldía, e lamentou que, tras 13 anos, se volvera “á casa de saída”.

Tamén remarcou que a aprobación deste documento leva a necesaria presentación do borrador da novo PXOM no prazo dun ano, dous anos para aprobalo inicialmente e tres anos e medio para a súa ratificación definitiva. Ademais, relacionou o baixo emprego no sector da construción na cidade olívica coa inseguridade urbanística.

O portavoz do Grupo Mixto, Rubén Pérez, denunciou que non se trasladou información detallada ás persoas a cuxas parcelas afecta a ordenación provisional e remarcou que debería abordarse a través dunha comisión de plan. Así, advertiu de que o modo de desenvolver este instrumento urbanístico levará a apertura de “procesos xudiciais” e unha “inseguridade xurídica”.

Mentres, Rubén P. Igrexas remarcou a necesidade de que Vigo conte cun proxecto que xere “consenso” e de que se elabore de acordo coa “participación social”. Deste xeito, asegurou que a anulación do plan do 2008 supuxo unha “oportunidade” para adaptar este documento aos intereses da cidadanía, en lugar de aos dos investidores.

RÉPLICAS DO GRUPO SOCIALISTA

Pola súa banda, o portavoz do Grupo Municipal Socialista, Carlos López Font, reprochoulle ao concelleiro nacionalista que se sitúe en contra deste proxecto a pesar de que a súa formación foi favorable á PXOM de 2008. Así, acusou ao BNG e a Marea de Vigo de non “entender” a cidade e asegurou que este instrumento urbanístico é un “proxecto conxunto” da mesma.

Así mesmo, denunciou a “utilización perversa” das institucións por parte do PP e lamentou que, cada vez que a Xunta adopta unha decisión que favorece a Vigo, pareza que “lle regala algo”. Nesta liña, lembrou que, en 2016, non aceptou a vía proposta polo profesor Luciano Parello para declarar a inaplicación da avaliación ambiental estratéxica e non obrigar á realización dunha novo PXOM, un informe que Rubén Pérez cualificou como un “gasto” durante a súa intervención.