O alcalde de Vigo, Abel Caballero, denunciou este mércores a “mentira” da Xunta sobre a construción dun centro de Atención Primaria en Bouzas, tras solicitar a administración autonómica unha prórroga do prazo da licenza.

Nunha rolda de prensa, o rexedor olívico explicou que o Sergas solicitou a licenza para construír o centro de saúde en xaneiro pasado, pero a día de hoxe “non hai nin proxecto básico nin de execución”, polo que a licenza non se pode facer efectiva e “vai caducar”. “Por iso pediron a prórroga”, sinalou.

“Eu xa o dixen, que era todo mentira. A Xunta non ten intención de construír o centro de saúde de Bouzas”, denunciou o alcalde, quen lembrou que o Concello adquiriu o solar e cedeuno ao goberno galego en 2008. “Despois de 11 anos o único que fixeron foi pedir unha prórroga da licenza”, apostilou.

Por outra banda, Abel Caballero tamén criticou a visita do conselleiro Román Rodríguez á cidade para anunciar a licitación do albergue de peregrinos do Casco Lanuxe.

Segundo explicou o alcalde, o Concello xa emitiu informe favorable tras a solicitude de licenza da Xunta, pero aínda falta documentación por achegar, como o aval da obra ou documentación da dirección técnica dos traballos, ademais do proxecto definitivo de execución. “Unha vez máis, viñeron a Vigo a facerse unha foto. Isto é a Xunta, e vou descubrir todas as súas mentiras, unha tras outra”, proclamou.