PSOE e BNG asinaron este venres o acordo que reedita o goberno de coalición en Ponteareas (Pontevedra), onde o nacionalista Xosé Represas volverá ser rexedor. Ambas as formacións confirmaron este pacto, a través dun comunicado no que expresaron a súa satisfacción cun acordo que “dá resposta ao mandato da cidadanía e servirá para afrontar con éxito os retos de Ponteareas ata 2023”.

Nacionalistas e socialistas suman 12 concelleiros (un máis que a maioría absoluta), fronte aos 5 do PP e os 4 de ACIP. De feito, o BNG logrou aumentar a súa representación na Corporación ponteareá, pasando de 7 a 9 concelleiros.

Tanto Represas como a portavoz do PSOE, Chus Garrote, proclamaron que “o acordo é bo para Ponteareas, dá estabilidade ao Concello por outros catro anos máis e permite afrontar os retos e demandas sociais de maneira eficaz“.

Este pacto baséase nun programa de goberno que recolle os eixos básicos de actuación para os próximos 4 anos, e establece tamén a asignación de responsabilidades “en proporción á representación” de cada grupo.

Así, o BNG asumirá, ademais da Alcaldía, as áreas de facenda, bo goberno e participación cidadá, medio ambiente, benestar social e igualdade, promoción económica, mobilidade, tráfico e seguridade cidadá, cultura, educación e deporte, medio rural e medio urbano. O PSOE encargarase das áreas de vías, obras e iluminación, formación e emprego, persoal e novas tecnoloxías. En materia de urbanismo, o plan será compartido entre as dúas formacións políticas, mentres que a responsabilidade da xestión será do BNG.