O Goberno galego acordou este xoves o cesamento do director xeral de Orientación e Promoción Laboral, José Alfonso Marnotes, que deixa o cargo a petición propia despois de ser designado para ostentar a portavocía do grupo municipal do PP no Concello de Vigo.
O presidente da Xunta, Alberto Núñez Feijóo, quixo agradecer “de forma especial” os seus servizos prestados neste departamento desde 2015 e desexoulle “sorte” no “reto” que asumirá a partir deste sábado, día no que se constituirán as corporacións locais.
José Alfonso Marnotes, que foi tamén vicesecretario xeral da Consellería de Economía e Industria desde 2009, foi o número 20 da lista dos populares na cidade olívica para as eleccións municipais do pasado 26 de maio.
Con todo, tras a dimisión da presidenta do partido a nivel local, Elena Muñoz, a xestora liderada pola exrexedora viguesa Corina Porro decidiu que sexa Marnotes o portavoz na corporación.
Na Dirección Xeral destacan o seu “compromiso” ao longo deste tempo no deseño de programas de formación cara ao emprego do futuro, coa posta en marcha de iniciativas tanto para persoas ocupadas como sen traballo. As competencias deste departamento serán asumidas, de momento, pola Secretaría Xeral de Emprego da Consellería de Economía.
