A 10ª Marcha solidaria ‘700 camisetas contra a leucemia’, na que se inscribiron 900 persoas, parte este domingo desde Vigo ata Pontevedra “coa intención de sensibilizar á poboación sobre a necesidade de que se formalicen novos rexistros de doantes de medula ósea non emparentados e unidades de sangue do cordón umbilical”.

A saída, desde o Centro Comercial A Laxe da cidade olívica, será ás 09:00 horas para os camiñantes e ás 10,00 horas para os corredores e os membros do Discamino e Proxecto Rodando, que un ano máis participarán nesta experiencia solidaria. Así, os participantes percorrerán os 36 quilómetros que separan a Vigo da capital da provincia a través do Camiño de Santiago.

“Esta edición ten como obxectivo asentar esta iniciativa na nosa sociedade, dando así valor á acción altruísta e solidaria de moitas persoas que son ou serán doantes e que regalarán vida aos que nos necesiten para recibir un transplante”, subliñou David Gil, o presidente da Asociación Frangil contra a leucemia, promotora desta marcha solidaria.

Como novidades para esta edición, e coa intención de que poidan participar máis persoas, sexa cal for a súa condición física, pódese realizar a marcha completa ou ben facela desde Arcade. Tamén haberá unha “Saída Pelona” a cinco quilómetros de Pontevedra, indicada para familias e nenos oncolóxicos.