Os sindicatos CC.OO., UGT e CIG ultiman os preparativos para unha nova xornada de folga, convocada para este mércores con paros de catro horas en cada quenda, para reclamar “solucións” á “sobrecarga” que afecta á liña de montaxe do sistema 2.

Así, explicaron que a folga está convocada entre as 10,00 e as 14,00 horas (quenda de mañá), entre as 18,00 e as 22,00 horas (quenda de tarde) e entre as 2,00 e as 6,00 horas (quenda de noite),e prevén que o seguimento “vai ser mesmo maior” que o do mércores da semana pasada, cando os paros eran de dúas horas por quenda.

Ademais, os traballadores están chamados a manifestarse ás 11,00 horas, nunha marcha que sairá da fábrica e percorrerá a Avenida de Citroën ata Castrelos, para regresar á planta. Ás 19,00 horas haberá outra manifestación co mesmo percorrido.

Os representantes dos traballadores lamentaron que a empresa “segue sen dar noticias” sobre a petición de mediación do Consello Galego de Relacións Laborais realizada polos sindicatos, que pediron un acordo extraxudicial de resolución do conflito (AGA), e se limita a emprazalos a unha reunión, o próximo 24 de maio, da mesa constituída para abordar melloras no traballo da liña de montaxe.

“Cremos que ese non é o foro adecuado, esa mesa leva xa varias reunións e non se avanza en solucións concretas”, sinalou, en declaracións a Europa Press, o portavoz de CC.OO., Santiago García Cameselle.