O líder de Podemos, Pablo Iglesias, visitará Galicia no marco da campaña electoral o próximo 22 de maio, xornada na que participará nun mitin para arroupar a candidatura de confluencia Marea de Vigo, encabezada por Rubén Pérez (Esquerda Unida) e na que tamén participa o partido morado.

Segundo fontes de Podemos, a axenda de Iglesias no seu paso por Galicia na campaña de europeas e municipais aínda non está pechada e podería visitar outras localidades como Ferrol, Santiago de Compostela ou A Coruña, municipios gobernados desde 2015 por candidaturas da chamada ‘unidade popular’.

Con todo, a postura adoptada nas eleccións xerais polos rexedores de Santiago, Martiño Noriega, e A Coruña, Xulio Ferreiro, pon en cuestión que finalmente Iglesias participe nas campañas de Compostela Aberta e Marea Atlántica.

E é que tanto Noriega como Ferreiro apostaron por non decantarse publicamente por ningunha das dúas candidaturas xurdidas da ruptura de En Marea –a propia En Marea partido de Luís Villares e a coalición En Común Unidas Podemos–. Nin o coruñés nin o compostelán chegaron a relevar o sentido do seu voto.

Debido á división e ante a cita coas urnas do 28 de abril, as asembleas de Compostela Aberta e Marea Atlántica decidiron outorgar liberdade de acción aos seus militantes e non situarse por ningunha das dúas listas xurdidas do ‘divorcio’ no proxecto da esquerda rupturista galega.

O único dos chamados ‘alcaldes do cambio’ que si expresou o seu apoio a unha lista nas xerais foi o ferrolán Jorge Suárez. O líder de Ferrol en Común e candidato á reeelección participou en actos cos membros de En Común e, de feito, seguiu a xornada electoral do 28 de abril desde o local da coalición de Esquerda Unida e Podemos, situado en Santiago.

MITIN EN VIGO

Así as cousas e a falta de confirmación da axenda completa de Iglesias ao seu paso por Galicia, Marea de Vigo expresa a súa satisfacción por que o líder do partido morado acuda á cidade olívica, o que, en palabras de Rubén Pérez, “dá unha medida da preocupación por esta cidade das pesonas que forman parte do Grupo Parlamentario de En Común-Unidas Podemos no Congreso“.

Vigo foi a cidade galega na que En Común-Unidas Podemos logrou un mellor resultado o pasado 28 de abril e tamén a única urbe na que Iglesias participou nun mitin no marco da campaña das xerais. Foi o 25 de abril, día no que o secretario xeral do partido morado tamén pasou pola Coruña, onde visitou a lonxa herculina, e Ferrol, cidade na que se manifestou con traballadores de Navantia.

“Esta visita reafirma a aposta de Podemos pola Marea de Vigo como espazo aglutinador das forzas de esquerda na cidade”, afirma Xaquín Pastoriza, número dous na lista de Marea de Vigo e responsable de Podemos na cidade olívica.

Vigo, xunto coa Coruña e Santiago, son as únicas cidades galegas nas que só existe unha única candidatura do espectro da chamada unidade popular. A diferenza de Lugo, Ferrol, Pontevedra e Ourense; Anova, EU, Podemos e Equo si alcanzaron un acordo para concorrer conxuntamente ás eleccións do próximo 26 de maio.