A cabeza de lista de Cs ao Congreso pola provincia de Pontevedra, Beatriz Piñeiro, avogou pola eliminación da peaxe da AP-9 no tramo que discorre por Redondela (Pontevedra).
Segundo recolleu a formación nun comunicado, Beatriz Piñeiro visitou Redondela este xoves para reclamar esta medida, que considerou “primordial”. Ademais, defendeu a necesidade de eliminar as peaxes das autoestradas que circulan polas áreas metropolitanas galegas.
Así mesmo, a candidata ao Congreso asegurou que a súa formación defende os postos de traballo da pasteira Ence, aínda que esixiu o cumprimento dos parámetros ambientais por parte desta.
Mentres, chamou a outras forzas políticas a non utilizar a continuidade da fábrica na ría de Pontevedra como unha “arma electoral” e instounas a visitala, como fixo ela este xoves.
