O alcalde de Vigo, Abel Caballero, advertiu de que promoverá unha “gran mobilización” para reclamar unha Facultade de Medicina na cidade olívica, se a Xunta non intervén para que se cumpra o acordo entre as universidades galegas e se reserve o grao de Robótica para a Universidade de Vigo.

Así o manifestou nunha rolda de prensa, na que constatou que a Universidade de Santiago de Compostela “vai ofertar 50 prazas dun curso de Robótica”, cando “estaba acordado que a Robótica se facía en Vigo”. “O reitor de Santiago rompe o acordo entre as universidades, e instala Robótica, que é un grao reservado para Vigo. E a Xunta non di nada”, denunciou Abel Caballero, quen instou ao goberno galego a que “faga cumprir os acordos”.

O rexedor advertiu de que “non pode ser que a USC rompa o acordo e a Xunta mire para outro lado”. A ese respecto, aseverou que o goberno autonómico “ten que intervir” porque, pola contra, Vigo iniciará “unha gran mobilización”, para “despois de eleccións”, reclamando unha Facultade de Medicina.

“Non nos imos a quedar quietos ante un incumprimento que dana gravemente á Universidade de Vigo”, proclamou o alcalde