Salvamento Marítimo rescatou na noite do luns a dúas persoas que navegaban na costa de Cangas do Morrazo (Pontevedra) nunha embarcación de pequenas dimensións que sufriu unha vía de auga.

Segundo informa o CIAE 112 Galicia, un dos tripulantes chamou ás 22,00 horas do luns á central de emerxencias para solicitar axuda, xa que a súa embarcación estaba a se alagar cando tentaban amarrar o barco a unha batea situada nas inmediacións do Faro da Borneira, a un quilómetro da costa.

O 112 puxo o caso en coñecemento de Salvamento Marítimo, que se encargou da coordinación do rescate. Un dos tripulantes foi posto salvo pola embarcación Salvamar Mirach, mentres que o seu compañeiro foi axudado por un barco que se atopaba nas inmediacións.

No operativo tamén participaron membros da Garda Civil e da Policía Local e voluntarios de Protección Civil de Cangas, que foron requiridos polo persoal do CIAE. O Servizo de Garda Costas de Galicia tamén foi informado, así como os efectivos de 061-Urxencias Sanitarias.