A Federación de Usuarios do Porto de Vigo (FUPV) mantivo este luns unha reunión co presidente da Xunta, Alberto Núñez Feijóo, na que tamén participou a conselleira do Mar, Rosa Quintana, e na que puxeron sobre a mesa as súas demandas para mellorar a competitividade da terminal olívica: axilización do PIF, ampliación do porto pesqueiro, ou implantación do portelo único coa figura dun xerente-coordinador.
Así o trasladou o portavoz da Federación, Enrique Mallón, en declaracións aos medios tras a celebración do encontro (que tivo lugar na delegación territorial da Xunta en Vigo).
Mallón incidiu na necesidade de “manter a mellora” no funcionamento do Posto de Inspección Fronteiriza (PIF) porque os usuarios da terminal olívica sofren unha “competencia feroz” doutros portos, como o portugués de Leixões.
A ese respecto, sinalou que, aínda que se debe observar un “estrito” cumprimento da normativa, debe mellorarse o funcionamento porque “non se pode admitir” a perda de tráficos, que “pode ser relevante” en mercadorías como conxelados.
Por outra banda, a Federación de Usuarios do Porto de Vigo insistiu na conveniencia de que se implante o chamado ‘portelo único’, que facilite a coordinación entre as diferentes administracións e institucións implicadas no funcionamento do porto.
Para iso, expuxeron a creación da figura dun “xerente” que faga eses labores de coordinación e xestión entre as distintas administracións que participan na xestión aduaneira e comercial.
Enrique Mallón tamén puxo de manifesto o apoio dos usuarios do porto á ampliación do porto pesqueiro e a “optimización de espazos”, e volveu a insistir na petición de que esta Federación teña un sitio no Consello de Administración do Porto, e participe nas “decisións do día a día” da terminal viguesa.
Finalmente, o portavoz da FUPV explicou aos medios que trasladaron a Feijóo a súa “preocupación” polas consecuencias do ‘brexit’, así como a satisfacción pola inclusión de Galicia no Corredor Atlántico de mercadorías.
En relación a esa conexión, Enrique Mallón lembrou que “se gañou parte da batalla”, pero “queda unha tarefa importante”, que é a conexión entre Vigo e Oporto (Portugal), que “tamén é imprescindible”.
