A deputada socialista viguesa Lola Galovart, quen foi cabeza de lista do PSdeG-PSOE por Pontevedra nas eleccións xerais de 2015 e 2016, confirmou este martes a súa intención de apartarse da política activa e regresar á súa profesión como xuíza.

A través dun comunicado remitido pola agrupación socialista de Vigo, Galovart expresou que, “ante o final da presente lexislatura”, considerou que “chegou o momento de volver a casa” e reintegrarse á súa carreira profesional na xudicatura.

“Quero agradecer ao Partido Socialista que me deu a oportunidade de presentarme nas eleccións, e en particular, ao alcalde de Vigo, Abel Caballero, pola confianza que sempre depositou en min“, expresou.

Finalmente, tras agradecer tamén a confianza e apoio dos electores, Galovart manifestou a súa esperanza de que estes case tres anos como deputada pola provincia de Pontevedra “fosen de utilidade para os cidadáns e cidadás”.