O grupo municipal do PP anunciou a solicitude, por rexistro, da listaxe nominal de empregados das concesionarias que traballan para o Concello de Vigo, así como os nomeamentos de persoal interino, “para saber se hai máis cuñados, sobriños, tíos ou curmáns de membros do goberno municipal ou do PSOE”.
Así o confirmou a portavoz ‘popular’, Elena Muñoz, quen advertiu de que a “ameaza” de Carmela Silva de denunciala ante os tribunais por “calumnias” é “froito do nerviosismo”. Achácao a unha “demoledora sentenza” que condena un funcionario vigués “por enchufar ilegalmente” á cuñada da tenente de alcalde e presidenta da Deputación.
“Perdeu os papeis, e tenta ameazar porque está desesperada e non quere que se fale deste tema. Por iso ameaza cunha denuncia, que non nos preocupa nada”, incidiu Muñoz, e engadiu: “Se quere amedrentarnos, non o vai a conseguir, non imos calar”.
A ese respecto, a portavoz municipal do PP insistiu en lembrar tanto o auto de sobresemento do caso con respecto á cuñada de Silva (por prescrición do delito de tráfico de influencias) como a propia sentenza que condena a un alto funcionario por prevaricación e malversación na contratación desa familiar. En ambas resolucións, indicou, os xuíces relacionan a contratación desa persoa co seu parentesco próximo con Silva. Por iso, Elena Muñoz preguntou se a presidenta da Deputación “vai ampliar a súa denuncia tamén aos xuíces”.
RESPONSABILIDADES POLÍTICAS
En todo caso, Muñoz recalcou que “unha cousa son as responsabilidades xurídicas e outras as políticas”, que son as que o PP vai “esixir” no pleno extraordinario que se celebrará o mércores. Carmela Silva xa anunciou que non acudirá por considerar que dita convocatoria conculca os seus dereitos fundamentais.
“Cada día é máis patente que está inhabilitada para exercer un cargo político, o máis digno que pode facer é marcharse”, insistiu a líder os ‘populares’ vigueses, quen proclamou que “aquí quen máis atentou contra a honra de Carmela Silva, foi a propia Carmela Silva”.
FUNCIONARIOS “QUE SE COMEN OS MARRÓNS”
Pola súa banda, o portavoz de Marea de Vigo, Rubén Pérez Correa, cuestionou que algúns “se fan os ofendiditos” cando hai unha sentenza que alude á contratación “dunha persoa vinculada a un membro da Corporación”, aínda que non deixe constancia explícita de que se trata de Carmela Silva.
Con todo, Pérez Correa sinalou que este caso podería ser un episodio “menor”, xa que sospeita que o sistema posto en marcha desde hai anos no Concello pode ser un “coadoiro” de “centos de persoas” que entran nas concesionarias ou nos plans de emprego a través dunha “plataforma de contratación encuberta”.
Así, denunciou que hai tempo, pero especialmente desde 2007, “os cargos políticos crearon unha pantalla de funcionarios premiados”. “Sempre hai un funcionario disposto a comerse o ‘marrón’ a cambio de prebendas”, sentenciou. Por iso, o portavoz de Marea volveu a pedir que se cree unha comisión municipal para investigar estas contratacións e a actuación de altos funcionarios nomeados polo sistema de libre designación, como o que foi condenado pola Audiencia. “Non está mal a explicación política, pero cremos que no pleno extraordinario non se van a dar as explicacións. Mesmo dubidamos de se participar”, apuntou.
