O BNG de Vigo criticou que o alcalde da cidade, Abel Caballero, non aproveitase a súa comparecencia na comisión de investigación sobre o accidente de O Marisquiño para comprometer “medidas” e “solucións” para evitar que “se volva a repetir” un suceso como o ocorrido o pasado verán.

En comunicado, a formación nacionalista pronunciouse deste xeito respecto da intervención do rexedor vigués que tivo lugar este martes no Parlamento de Galicia, unha comparecencia que o BNG asegurou que non serviu para “dar explicacións” nin para depurar responsabilidades.

Neste sentido, o candidato nacionalista á Alcaldía de Vigo, Xabier P. Igrexas, lamentou que o alcalde “perdese a oportunidade” de achegar documentación pertinente á Cámara e de “esclarecer o que pasou” durante o festival.

Deste xeito, reprobou que, en lugar de defender a súa xestión á fronte do goberno local, reiterouse ” nun discurso circular” e dedicase os “case 20 minutos da súa primeira intervención” a cuestionar o motivo da súa comparecencia. Igrexas acusou así a Caballero de apoiarse na Constitución e no principio de autonomía local “para non dar explicacións nin asumir ningunha responsabilidade” polo suceso.