O PP de Vigo valorou a convocatoria de eleccións xerais (que terán lugar o próximo 28 de abril), pero lamentou que se fixaron na “data que convén ao PSOE”, en lugar de no día no que se celebrarán os comicios municipais, autonómicos e europeos, o 26 de maio.

Nun comunicado, a portavoz do Partido Popular local, Elena Muñoz, acusou así ao presidente do Goberno, Pedro Sánchez, de fixar a data das eleccións xerais de acordo co “interese” do seu partido, en lugar de realizalo en función do dos cidadáns.

Muñoz denunciou o anuncio do peche do Instituto Social das Forzas Armadas (Isfas) de Vigo, unha entidade dependente do Ministerio de Defensa que se encarga da xestión do Réxime Especial da Seguridade Social das Forzas Armadas e da Garda Civil.

Ademais, a portavoz do PP local acusou ao alcalde olívico, Abel Caballero, de ser “cómplice” dos Orzamentos Xerais do Estado (PGE) que, ao seu xuízo, prexudicaban os proxectos “que Vigo necesita”, como a gratuidade da peaxe a AP-9 na saída de Redondela e a conversión en tramo urbano desta autoestrada ao seu paso por Teis. Por iso, Muñoz chamou á cidadanía a mobilizarse e reclamou o voto para o seu partido.