A Fiscalía pide dous anos e medio de prisión e multa de 3.000 euros para cada un dos tres responsables (dous socios e un encargado) un clube de alterne instalado nun chalé en Vigo, como autores dun delito contra os dereitos dos traballadores, por ter empregadas a case unha vintena de mulleres que exercían a prostitución que non foran dadas de alta na Seguridade Social.
Os feitos foron denunciados tras dúas visitas conxuntas da Inspección Laboral e de axentes da UCRIF da Policía Nacional ao clube, situado na zona de Castrelos. Así, púidose constatar a presenza de 19 mulleres que exercían a prostitución, sen estar dadas alta na Seguridade Social, e nalgúns casos sen permiso de traballo ou en situación irregular en España.
A maioría das traballadoras eran de nacionalidade colombiana, e tamén había mulleres brasileiras, dominicanas, unha paraguaia, unha venezolana e unha procedente de Romanía. Por estes feitos, impúxoselle á sociedade encargada de xestionar o club unha multa de 40.000 euros por parte da Seguridade Social.
O clube pechou en setembro de 2023 e os donos do chalé onde se situaba denunciaron aos acusados por falta de pagamento do aluguer do inmoble. A vista por estes feitos está sinalada para este martes, día 10 de febreiro, na sección quinta da Audiencia Provincial de Pontevedra, con sede en Vigo, tras suspenderse o pasado mes de novembro ao non alcanzar unha conformidade.
