Axentes da Policía Nacional de Vigo detiveron a un empregado dunha cafetaría da cidade, un home de 27 anos de idade, como presunto autor do furto dun sobre que contiña máis de 1.000 euros, e que estaba na caixa de caudais no establecemento.

Segundo informaron fontes policiais, a investigación iniciouse a principios de febreiro, cando a responsable dunha cafetaría da rúa Ecuador presentou unha denuncia en Comisaría pola subtracción dun sobre con máis de 1.000 euros, e que gardaba nunha caixa de caudais para pagar a un provedor.

Cando se dispuña a realizar o arqueo de caixa e pechar a contabilidade descubriu que o sobre co diñeiro desaparecera.

O grupo de policía xudicial da Comisaría Centro iniciou as pescudas e comprobou que non había signos de forzamiento nin na caixa nin nos accesos ao establecemento.

Así mesmo, constataron que, entre os empregados da cafetaría, había un con antecedentes policiais por feitos similares. Así, a investigación centrouse nese sospeitoso, que foi finalmente detido como responsable do furto. O detido e as dilixencias practicadas foron postos a disposición do xulgado de instrución número 5 de Vigo.