O alcalde de Vigo, Abel Caballero, anunciou este mércores que solicitou “ao intendente” da Policía Local un “informe” acerca dunha protesta protagonizada por un grupo de axentes en dependencias da Alcaldía, pedindo a equiparación salarial cos funcionarios do servizo de bombeiros.

Cuestionado polos medios acerca desa protesta (os axentes concentráronse este martes ante a Alcaldía con chifres), o rexedor olívico avanzou que pedira ese informe: “Ao intendente, non ao xefe da Policía Local, porque o xefe son eu”. Con respecto ás demandas dos policías locais, Abel Caballero limitouse a pedir “tempo ao tempo” e non entrou a valorar as reivindicacións.

As protestas dos axentes están motivadas, segundo denunciaron, polo incumprimento dun acordo plenario de hai 10 meses, no que se establecía a equiparación salarial entre policías locais e bombeiros. Segundo trasladaron, o goberno municipal alude a problemas orzamentarios para non executar devandito acordo.