Unha parella, composta por R.J.P, de 41 anos, e C.C.P., de 43, foi detida este luns ás 2,50 horas como presunta autora dun delito de furto nun bingo da rúa Urzáiz de Vigo, de onde supostamente levaron 30 moedas dun euro.

Segundo precisou a Policía Local nun comunicado, os feitos tiveron lugar cando os axentes se desprazaron á rúa Faisán, onde se atopaban os presuntos autores do furto. Alí, comprobaron que estas persoas, ás que perseguía un home que manifestou ser o denunciante e dono do bingo, coincidían coa descrición facilitada.

O home que contactara á Policía detallou que, pouco antes, mentres pechaba a caixa da sala de xogos, depositara 30 euros en moedas dun euro sobre o mostrador. Segundo precisou, a continuación distanciouse do diñeiro.

Así mesmo, suxeriu que podía ser “nese momento cando dita parella entrou no interior”, pero que non se decatou diso ata que abandonaron o local e un cliente alertouno da subtracción do diñeiro, segundo referiu a Policía Local.

Tamén explicou que, posteriormente, os presuntos culpables fuxiron e el seguiunos mentres daba aviso ao corpo de seguridade. A pesar de que a parella negou os feitos, tras ser cacheada, os axentes atoparon 29 moedas das que non explicaron a procedencia. As dilixencias foron trasladadas ao xulgado por un presunto delito leve de furto.