A Policía Local de Vigo identificou, por sexta vez en menos dunha semana, ao veciño octoxenario que foi denunciado en reiteradas ocasións por raiar coches e danar as fechaduras de vehículos e portais introducindo escarvadentes de madeira.

Segundo informaron fontes do 092, na tarde deste xoves, unha dotación desprazouse á rúa Reiseñor, no barrio da Dobrada, alertada pola presenza deste home causando danos en vehículos estacionados.

Nesta ocasión, os axentes comprobaron que o ancián raiara dous coches, polo que se procedeu á súa identificación e á correspondente tramitación de denuncial xudicial.

Este home conta con máis dunha ducia de antecedentes policiais por feitos como estes e, segundo palabras da propia Policía, ten ao barrio “atemorizado”. Así, consta como autor de desfeitas en centenares de coches (só neste mes de xaneiro, máis de 120 vehículos).