O Consorcio Aeronáutico Galego presentou este martes a primeira aceleradora do sector aeronáutico e dos vehículos non tripulados de Galicia, a Business Factory Aero, e fíxoo en colaboración coa Axencia Galega de Innovación, Indra, CTAG e a Fundación CEL.

O presidente do Consorcio Aeronáutico, Enrique Mallón, anunciou esta nova aceleradora, BFAero, facendo fincapé na “relevancia” que terá para o tecido empresarial galego e agradecendo a “aposta” que a Xunta realizou polo sector.

A aceleradora deuse a coñecer en Vigo coa presenza de representantes de todas as institucións que a impulsaron. O director do Área de Servizos de Gain, Pedro Areas, destacou que a BFAero “achega diferenciación a Galicia como referente de vehículos non tripulados”.

Pola súa banda, o director do Área de Vehículos Aéreos de Indra, Javier Barcala, recalcou a importancia da “tutorización dos emprendedores” e que a súa entidade está “en continua procura de talento”, polo que a través desta aceleradora buscan “atraer” a empresas estranxeiras para que se instalen en Galicia.