O PSOE de Vigo atribuíu as críticas pola falta de cooperación do Concello olívico na comisión de investigación do Marisquiño ao “politiqueo barato do presidente da Xunta e do PP”, e volveu a insistir en que “o que ten que explicar Feijóo é por que non estivo a noite do accidente”.2

A través dun comunicado remitido aos medios, o secretario dos socialistas vigueses, o deputado Abel Losada, referiuse aos parlamentarios do PP que participan nesa comisión de investigación, e que este luns presentaron un escrito no rexistro municipal solicitando a documentación do expediente do Marisquiño que o goberno vigués non facilitou ao Parlamento de Galicia.

A ese respecto, Losada subliñou que, ata agora, a xuíza instrutora, o único que aseverou é que o sinistro se produciu nun peirao portuario, xa que logo, “responsabilidade e obrigación do Porto”. “O resto é politiqueo barato do presidente da Xunta e do PP. O que ten que explicar Feijóo é por que non estivo aquí a noite do accidente”, incidiu.