Aicha E.F., a muller vítima de violencia de xénero con tres fillos menores que vai ser desafiuzada da vivenda na que reside en Vigo o próximo día 17, informou este venres de que conseguiu un avalista para alugar outro piso na cidade.
Trátase dun veciño de Vigo que viu como a Federación de Asociacións Veciñais Eduardo Chao (Favec) denunciaba o caso do desafiuzamento de Aicha E.F. nos medios de comunicación e se puxo en contacto con ela para ejecer como avalista para que esta muller puidese facer fronte a outro contrato de aluguer, segundo transmitiu ela mesma.
“Estamos contentos todos”, sinalou Aicha E.F. en relación tamén aos seus tres fillos, que se alegraron ao coñecer que no novo piso terán ascensor e que poderán seguir escolarizados no mesmo centro.
Pola súa banda, a presidenta da Federación de Asociacións Veciñais Eduardo Chao (Favec) de Vigo, María Pérez, celebrou que esta familia se poida mudar, “porque o día 17 íanse a quedar na rúa”, grazas a que un veciño de Vigo chamou á entidade para “tratar de axudar”.
“Pedimos que haxa un parque público de vivendas que sexan accesibles ás familias que non teñen un traballo para poder avalar os contratos de aluguer ou que o Concello se adhira ao plan de vivendas baleiras da Xunta”, sostivo María Pérez.
Respecto das axudas que recibe, Aicha E.F. explicou que o pasado mércores a traballadora social do Concello de Vigo manifestoulle que a ía a “apoiar en todo”.
“O Concello dérame dous meses de aluguer e eu gardeino, é co que paguei a entrada”, indicou no medio da mudanza. Con todo, a presidenta da Favec criticou que “apoiala sería porlle os medios para unha solución habitacional, o cal non están a facer”.
“Aínda non me chegou”, sostivo Aicha E.F. sobre o ‘bono alugueiro’ da Xunta, para aclarar: “En canto teña o contrato, me dixeron que me pagan a metade”.
Neste sentido, mostrouse confiada en que poderá asumir o importe restante do aluguer porque “agora” está a cobrar “650 euros” e está a buscar traballo “do que sexa”: de “ama de casa” ou para “limpeza”, segundo as súas palabras.
