Persoal de limpeza dos colexios públicos e escolas infantís de Concello de Vigo concentrouse este mércores ante a sede da empresa concesionaria do servizo, Mantelnor, como rexeitamento ao despedimento dun traballador e para reclamar a súa readmisión.

Os traballadores dos servizos de limpeza destes centros escolares xa avanzaron que volverán concentrarse na sede da empresa concesionaria o vindeiro mércores día 16 e que os días 23 e 30 deste mes farano no propio Concello para “demandar a implicación” do goberno local.

Por parte do comité de empresa de Mantelnor, presidido pola CIG, consideran que se trata dun despedimento “totalmente inxusto” xa que se tratou dunha “medida drástica” ao non existir advertencia previa ao afectado “mediante sanción ou amoestación por escrito”.

O comité reclamou á empresa a “inmediata readmisión” do despedido e instouna a aplicar outra medida “menos drástica” no caso de que o considere oportuno.