O presidente de Conxemar, Eloy García, confirmou este mércores que a asociación ten abertas negociacións co Real Club Celta destinadas a pechar unha “alianza estratéxica”, baseada nos valores que comparten ambas entidades. En declaracións aos medios, tal e como avanzou Faro de Vigo, Eloy García confirmou que Conxemar está “traballando” co club vigués e que están “contentos cos avances” xa realizados, aínda que non hai “nada pechado”.

O presidente de Conxemar evitou entrar en detalles sobre se será un acordo meramente colaborativo, se implicará unha operación económica ou un cambio na denominación do estadio Abanca Balaídos. “É un acordo no que Conxemar e o Celta de Vigo compartimos moitos valores. Iso facilita as cousas”, remarcou.

A este respecto, falou de valores como “o traballo en equipo, o esforzo e o xogo limpo”, ademais de ámbitos fundamentais para Conxemar, como “a nutrición e o medio ambiente”. “Iso facilita moito o traballo. Avanzamos moito pero aínda non está pechado (…), temos moita ilusión por sacar adiante este acordo por ambas as partes”, reiterou, antes de insistir en que “o prudente e o mellor para todos é non dar máis información”.