O goberno municipal de Vigo tombou, coa súa maioría absoluta no Pleno, a moción presentada polo PP para reclamar a comparecencia do alcalde, Abel Caballero, en relación coa imputación da concelleira de Seguridade por un posible homicidio imprudente (polo accidente mortal do Saltamontes ocorrido en agosto de 2024).

Así, a proposta do PP era instar o alcalde a comparecer ante o órgano de representación municipal para dar explicacións “ás que politicamente está obrigado”, despois dun accidente que custou a vida a un veciño da cidade, nunha atracción que non contaba con autorización e que non foi precintada, e cunha concelleira, a responsable de Seguridade, Patricia Rodríguez, imputada xudicialmente. A portavoz do grupo, Luisa Sánchez, lamentou que o rexedor non estivese este luns na sesión plenaria (asistiu en Madrid á reunión da Comisión Executiva Federal do PSOE), e que tampouco compareceu no pleno extraordinario do pasado 19 de xuño polo caso Saltamontes, ao suprimir a súa comparecencia da orde do día.

“Ante a morte dun veciño e a imputación da concelleira, escóndese, o mesmo que ten tanto apego polos micrófonos“, constatou Luisa Sánchez, que lamentou a “covardía política” de Abel Caballero, que tampouco “se reuniu aínda” coa familia do mozo falecido na atracción. “É inconcibible que haxa unha concelleira imputada, que non dimita, e que ninguén dea explicacións. O alcalde debería estar aquí, e non só comparecer para festas e fogos artificiais”, afirmou a líder do PP, que tamén afeou que os edís do goberno local pechen filas en torno ao alcalde e a Patricia Rodríguez, todo para “para protexer ao amado líder, por encima de Vigo”.

O BNG, pola súa banda, presentou unha emenda, que foi aceptada polos ‘populares’, para pedir a “reprobación” do rexedor e a súa xestión. O portavoz do grupo nacionalista, Xabier Pérez Igrexas, pediu, sen éxito, que este debate servise para que o PSOE se desculpase pola súa actuación no pleno extraordinario sobre o accidente do Saltamontes, no que o portavoz do goberno tivo unha “actuación politicamente miserable e repugnante a nivel humano”, por dedicarse a falar de enquisas electorais en lugar de dar explicacións.

“Foi lamentable, retrata o nivel de degradación política, ética e humana”, proclamou, e lembrou que son xa case 700 días sen dar esas explicacións, sen crear unha comisión de investigación, ou mesmo culpabilizando á comisión de festas e á propia Policía Local. O portavoz nacionalista tamén afeou a ausencia do alcalde da sesión plenaria sen motivo xustificado, máis que ir a Madrid para facer “de palmeiro do seu xefe”.

“MOCIÓN DA CARROÑA”

Pola súa banda, o portavoz do goberno local, Carlos López Font, definiu a proposta do PP como “moción da carroña” e tachou de “miserables” aos grupos da oposición por “xogar coa dor allea”. “Son o máis indigno da política“, sentenciou. O edil socialista, tras volver reclamar respecto pola presunción de inocencia e pedir deixar que traballe a Xustiza, reiterou que esas esixencias de PP e BNG son “produto da frustración e a desesperación”.

Font lembrou que, ante situacións similares, houbo cargos do PP que non dimitiron, e reafirmou o apoio do goberno local a Patricia Rodríguez, “unha magnífica concelleira, imprescindible no goberno de Vigo”. “O PP e o BNG non nos van a dar leccións. Este goberno é honrado, traballador e recoñecido pola cidade”, proclamou.

UN POEMA E UNHA MENSAXE DE APOIO: “CONTAS CONNOSCO”

Tras o debate, e antes da votación, a tenente de alcalde, Carmela Silva, que foi a encargada de presidir o pleno ante a ausencia de Caballero, trasladou unha mensaxe de apoio á concelleira de Seguridade. “Querida Patricia, contas co apoio do grupo, co noso afecto e consideración. Sabemos do teu traballo, dedicación ao servizo público e que aplicas a lei ata as últimas consecuencias”, sinalou Silva.

A tenente de alcalde referiuse tamén a episodios como os do Yak-42, Metro Valencia ou as residencias de maiores de Madrid durante a pandemia de Covid. “Aí si se fixeron as cousas mal, e nin unha dimisión”, remarcou, antes de repetirlle a Patricia Rodríguez: “Contas connosco”.

Finalmente, dedicou algúns versos do poema ‘Xente necesaria’, do arxentino Hamlet Lima Quintana, á edila de Seguridade, á que advertiu de que “o que pasou aquí” é que hai xente “que nin sequera debe abrir a boca, porque todo o enturba, todo o envenena, todo o enche de odio e tristeza”. “Foxe dos necios”, rematou Silva, citando a Baltasar Gracián.